قصيدة تصف الوضع الحالي للبلاد

قصيدة ائعة تصف الحال في البلاد :
ستين ألف راحوا عالبلاد ضحايا** والخاتمة تبديلت نشيد ورايا**
ماأهناك جديد.. أمفيت العلم تبّدل أمع النشيد **
وبّدلنا عقيـد بأربعيـن عقيـد** وراء كل واحد جاهزات سرايا**
وأزلام للطاغي أبثوب جديد **على شعبنا ردوا قديم وصايا**
ماأهناك أخبار.. ولا من بشاير لافته لأنظار**
وما عاد تعرف من هم ثـوار** ومنه اللى مندس دار خلايـا**
ومن هو اللى حريص عالموكـار** ومن هو للثورة أيريـد نهايـا**
ومن هو المخلص صح والسمسار** ومن هو أمعانا وفى القفا سلاّيا **
ما أهناك حكاوي** وما أهناك واحد عالخزانه ماوى**
ألا كلها تاكل وما حد يـاوي** ولا عقبوا يابس ولا خضرايـه**
مجلس وزاري في القيادة ’’هاوي’’ **تحلف عليهـم يـا ولد غـزّايـا**
يا عاصمتنا ياعاصمتنا ياأم القرون ملاوي** ليش دمعتك عالخـد يا بكـايـا**
عندك ضناك عندك تريس بـلاوي **دونك أيطيحوا والصدور عـرايا *************
ما اهناك شنهو اتقول**اللي ايسير لاهو عدل ولا مقبول**
الوطن يشكى غيبه المسئول ** لاجيش و لاشرطةولاطرايا**
وسلاح فيد الناس موش أصول**مجلس تردى ما عليه أعبايـا**
الثورة أقريب أتطق الحـول**وشعب مفلس واليديـن خَلايا**
الفقر والعازه أبعرض وطول**أحلامنا فاضت اليوم كبايا *********
باديا أمواير شّر.**جوه العرب متكدرة ما أتسر*
شرابهم تعكر فى الشراب غثر** الوعود عدّت امغير دعايا **
الشعب يحسب يدفنه هالشر**اعيشوا أبامانه والبطون ملايـا**
الراتب تبخر والحساب حمر **وهم فى الفنادق عايشين هنايا**
ملايين عدت يا (الكيب)أجعر**بالشعب راهو ماأهناك أعنايا **********
نريدوا جيش..أنريدو شرطه وأنريدو بيش نعيش..بعد بهدله نبوا أنبت ريش..وكيف غيرنا ننعم أبكل مزايا**
أنريد حاجتى بالعدل مانرشيش**أسلوب الطحالب راه سّد كفايا**
مالخارج وزاره يا أجليل’ ليش**عرب ليبيا فى الداخل عرب نهّايـا **
أثنين جنسيه وعقاب أيطيش**تفضي الوزارة ونقعدوا فى حكايا**

يسلمين ايديك علي القصيدة التي اري فيها كثير

الياس والتشاؤم والتي ايضا تسرد الواقع الان في

ليبيا بس لازم نكونو متفائلين والشعب الليبي

الان شعب واعي وماعاد حد يضحك عليه ...ودامت

ليبيا حرة وامنة