السفيرة عزيزة -- الرويعى الفاخرى

[center]

عليش ليش يا قلب خفــّـاق ... اليوم طــاير الا اطيارة

وبين عوج لضلاع صعفاق ... والشوق شايطة فيك ناره

اغلبت عادتك يا العشّــاق ... وعاودت النظر في انظاره

نين نفـّــــذن فيك مزراق ...ابقيت ترتعد من احراره

هـــــذي خاتمة خطف لرماق... واتصنت قلوب العذارى

ابقيت للنواريــــن دقـــــداق... معاك يولعن من شرارة

تقول شايلك سيل دفــّـــــــاق ...تمشي للبلا في اوكاره

وتجي واكــله جمر حرّاق... وهـاريك دكم الغــدارى

تمشـــي شايلك حلم برّاق ... وعين ضـــاحكة للبشارة

وتجي كاسرك سيف لفراق ...عليك رايحة يا اخســـارة

وتعاود بعد ضيق لضياق ... مــــع كل ردّة اجبـــــارة

و عليك وين عدّا بالاشواق... اللي وينما اغلي تــوارى

ترفّ رفّـّة الطير لا فـــاق ...ترقى تحــوم و تدير دارة

من أيّ المنا يـــــا الشوّاق... بمبات الهنا في اجـواره
و ينوضن زعازيع لفراق...وتبات في خلا صقع داره

***
القانـّه برقلي ... م العين بارق الشوق و العقل يقلي
و جت جسرة العين في غيض عقلي ... و اللي تجسّر النيب هوجة فحلها

القاني المونس... بريحة شذا طلق في غرس تونس
ولفحة احرار شوق في وجه يونس... و ورا اسوارها عبد جاي بشكلها

و القنك عزيزة... يا امدللة يــــــــا اصفيرة غزيــــزة
انتي شمس ف الكون نور وركيزة ...واللي يجهلك كل حاجه جهلـها

و القاني اصدفتك... و سامع عليك نيــــن بالعين شفتك
عرفتك وحسيت نفسي عرفتك... بلا معرفه اسنيـن طـايل اجلها

و القنك جميلة ...امحوددة احدود الجمـــــال و جليلة
كتفتي جميع من حضر بالجديلة... السالمة اصويبعات جــادل جدلها

والقنك حكيتي ...وعلي قيس لوجـــاع ف العقل جيتي
قذاذير لشواق هاكـــي وهيتي... اللـي لكل قذّار لاخر قفلـــــها

والقنك امليقة ...وقدّك اترج فيـــــه خطوه رشيقة
ولفظك تذوب فيــــه بسمة رقيقة... و خفة الدم زيــن عقلك عدلها

والقنك وثيقة... وكيفك انريد ويـــن نلقى عشيقة
حقيقة ان كان تنشدي ع الحقيقة... دقيقة معاك كي الدنيا وهلها

والقنك الدنيا ...وحدود المنا لكـــــــل طلاّب منية
المنية صحيح فيـك عنية و قنية... و منية اخرى ما تجي في بدلها

والقانك امنيتي... بهرتي علي طـــــــول عيني مليتي
سحرتي علي طول عقلي خذيتي... انورتي علي طول نفسي املها

والقنك اشفقتي ...ورقتي و كيمـــا عشقتك عشقتي
حرقتي بنار الغلا و انحرقتي ...ووقتي اللي هذا ف الروح كلها

والقانك اتقدّي... صحيح الغلا و فيك نا القيت ندّي
انودّك بصافيه وانتي اتودّي... بصافيه وانتي و نا في قبلها

والقني نخاير... و حاير ومازلت ف الــراي حاير
وطاير ونا بين نازل وطاير ...وداير اعزوم غيـر بيّن فشلها

والقانها قوية... لوعتي وما انـّــــــام ساعة هنيّة
وشايطه النار فيّ صبح وعشية... ولمتا النار نا نريـد انحملها

والقني نكابر ... وصابر ومن قبل نا كنت صابر
وجابر الا ع العدم كل جـابر... اجبارته ان زال دوم حاسّ بزللها

والقني الحالم... بعالم ونا جيت فـــي غير عالم
مسالم وما جيت في يوم سالم ...وظالم الها جيت نفسي بولهة

والقني امريّب... اقريّب الا ننقــــدع من اقريّب
انغيّب وياريت نقدر انغـيّب ...انسيّب ولـو يوم منقض عللها

والقني جنوحي ...وجدّاية الغـــــــرد حمّت اجروحي
بجردي بلا جرد نخلص بروحي... ودابين هالصرد ما اسّع قتلها

---

القنّي صريع الغلا من اولها... و نقول يا الخلاص خلّّّص وحلها[ندعوك للتسجيل في المنتدى أو التعريف بنفسك لمعاينة هذه الصورة]